Елмас е подготвен за македонскиот дуел во Лига Европа!
На денешната прес конференција во пресрет на мечот од третото коло во Лига Европа в четврток помеѓу Риека и Наполи своите очекувања ги сподели македонскиот репрезентативец Елиф Елмас од редовите на италијанскиот клуб.
Натпреварот од групата „Ф“ помеѓу Риека и Наполи ќе се игра од 18.55 часот, на табелата по две кола води АЗ Алкмаар со шест бода, пред Наполи и Реал Сосиедад по три, а Риека е последна без бодови.
Во редовите на хрватската екипа се очекува да настапи Дарко Велковски, а повреден е Милан Ристовски.
Нашиот фудбалски „Дијамант“ Елмас после три неделното опоравување од коронавирусот, доби минутажа против Сасуоло, а сега се надева дека ќе добие шанса од тренерот Џенарот Гатузо и во ЛЕ против Хрватите.
– Подготвен сум да се вратам на терените, добро тренирав. Имав околу 10 дена одмор без тренинзи, но најтешкиот дел е веќе зад мене. Ми требаше подолг период да се вратам во потребната физичка форма и сега се чувствувам добро.
Не знам дали ќе играм в четврток, но чувствувам дека тренерот ми верува во пресрет на утрешниот меч. Ова за нас е еден важен натпревар и мораме да покажеме карактер, пред нас имаме тежок ривал. Едвај чекам да играм, покажам што знам и ја искористам мојата позитивна енергија да му помогнам на тимот – рече Елмас.