Поранешниот тренер на „црвено-црните“, Раул Гонзалез во интервјуто за „Ел Норте де Кастиља“ говореше за новиот историски успех на Вардар во ЛШ.

После заминувањето на Парондо, веднаш македонскиот и европски ракометен шампион пронајде замена, нов шпански стратег Писонеро. Во меѓувреме тимот почна и да се засилува за следната сезона.

Гонзалез, поранешниот селектор на нашата репрезентација или популарниот „Ел Команданте“ вели дека „црвено-црните“ не згрешиле со новиот потег на тренерската клупа.

– Давид Писонеро е мој пријател, уште еден тренер кој доаѓа од школата на Ваљадлид. Во Вардар сакаа техничар со слични карактеристики и мислам дека Давид одлично ќе се вклопи во екипата – вели Гонзалез.

Запрашан и околу тоа дали летонскиот десен бек Даинис Криштопанс е клучен играч на тимот, тој одговори:

– За било кој тим, не само во Вардар. Со неговата висина и тежина не само што е клучен, но и придонесува со своите асистенции до своите тимски колеги. Тој има уште една година од договорот со Вардар, а наредната сезона ќе дојде во ПСЖ – додаде Гонзалез кој пак има уште две години од соработката со францускиот клуб.

Не го изненадува фактот што Вардар одново е на врвот во Европа, на располагање со фантастични играчи, Роберто Гарсија Парондо одлично ја подготвил екипата за решавачките средби.

Првата цел и во новата сезона на Раул со париската екипа ќе биде пласман на Ф4 турнирот во Германија, а потоа и со сите сили во обид да го симне Вардар од тронот.