Експлозија во џамија: Најмалку 30 талибанци загинаа за време на обука за правење бомби
Најмалку 30 талибанци во Авганистан загинаа за време на обука за експлозиви. Според авганистанските власти, групата се собрала во една џамија за да има обука за правење бомби во селото Култак, во северниот дел од земјата. Армијата таму соопшти дека експлозијата била толку моќна што никој не преживеал. Меѓу загинатите, наводно, имало шест странски државјани за кои се верува дека биле експерти за мини.
Портпаролот на авганистанското Министерство за одбрана, Фавад Аман изјави дека станува збор за несреќен случај.
– Во минатото, непријателите имаа шест, осум или десет жртви во своите редови, поставувајќи бомби или правејќи мини, но ова е првпат да претрпат толку големи загуби, изјави Аман.
Од друга страна, талибанците потврдија дека имало експлозија, но ги негираа обвинувањата дека има жртви. Портпаролот на милитантите, Забихулах Муџахид изјави дека експлозијата се случила во просторијата каде што се чува муницијата.
Извор: news.com.au