Видеозапис снимен од Кина покажува експлозија во Северна Кореја, објавија бројни медиуми денеска, додека еден од јужнокорејските медиуми објави дека имало истекување на природен гас што предизвикало смртоносна експлозија во понеделникот.

Западните медиуми засега не ја потврдија автентичноста на видеото, кои беа добиени од АП и порталот „Дејли НК” од Сеул, што се занимава со ситуацијата во Северна Кореја.

Други јужнокорејски медиуми, исто така, цитираат неименувани извори кои наведуваат дека имало неколку експлозии. Цитирајќи неименуван извор од Северна Кореја, Дејли НК денеска објави дека до 15 лица загинале во експлозија и пожар што следувал во градот Хисан во провинцијата Јангганг, во близина на границата со Кина.

Видеото прикажува пожар над врвовите на дрвјата, со звук на бројни експлозии.

Севернокорејските медиуми не го спомнаа инцидентот, а властите на Јужна Кореја соопштија дека засега не можат да ги потврдат извештаите.