Петмина загинаа, а неколку лица се повредени денеска во ерупција на вулкан на новозеландскиот Бел остров (White Island), популарна туристичка дестинација каде се верува дека во време на ерупцијата имало најмалку 50 луѓе.

Од островот се спасени 23 лица. Пет починаа од добиените повреди, а 18 се во болница. Како исчезнати се водат повеќе од 20 луѓе.

Кога вулканот еруптирал, луѓето кои стоеле во негова близина најверојатно искусиле облаци од жешка пареа, отровни гасови и уривање на опасни карпи, јавува Си-ен-ен.

Според вулканологот Џесика Џонсон од универзитетот Ист Англија, отровните гасови биле толку интензивни што туристите можеле да почувствуваат мирис на хемикалии.

„Од вулканот, во чиј кратер се наоѓаше кисело езеро, веројатно излегувала жешка пареа, а поради ерупцијата се уриваа карпи“, кажа Џонсон.

Таа смета дека повеќето повреди нстанале поради самата експлозија, а помал дел од изгорениците биле предизвикани од пареата.

Дерек Вајман, геолог од универзитетот на Сиднеј, верува дека вулканот при ерупцијата исфрлил материјал кој имал околу 1.000 Целзиусови степени.