Европскиот производител на авиони „Ербас“ ја зголеми прогнозата за побарувачката на авиони во следните 20 години.

Во својот годишен извештај за перспективите на глобалниот авио-пазар, „Ербас“ предвидува дека глобалната авио-флота ќе се зголеми за повеќе од двојно до 2038. година, на 47.680 летала, пренесува агенцијата „Ројтерс“.

Авио-превозниците и компаниите за лизинг на авион, како што се предвидува, ќе превземат 39.210 нови патнички и теретни авиони во следните две децении, што е повеќе во однос на претходно прогнозираните 37.389, затоа што авио-компаниите сакаат да ги искористат предностите од економичноста од заштедата на гориво кои ги нудат најновите авиони.

Во побарувачката за нови авиони ќе води Азија, чија авио-индустрија „цвета“ поради експанзијата на градовите и растот на азиската средна класа.

Побарувачката од Кина, според очекувањата, ќе ги надмине барањата на САД и Западна Европа, додека Индија и новите производители, како Виетнам, ќе забележат најбрзо темпо на раст.

Меѓутоа, „Ербас“ ја намали 20-годишната проекција за растот на авио-сообраќајот, на 4,3 проценти годишно во однос на претходно прогнозираните 4,4 проценти.

Како причина за забавувањето на авио-сообраќајот во оваа година, од „Ербас“ ја наведуваат трговската војна меѓу САД и Кина.