„Ековита” против изградба на гасна централа од комунален отпад во Неготино
Здружението на граѓани „Ековита” е против изградба на гасна централа од комунален отпад во Неготино, вели Сашко Тодоров, биолошки инженер и претседател на неготинските екологисти, по нивните сознанија дека постои можност за отпочнување со реализација на гасни централи од комунален отпад во Неготино, Битола и Скопје.
-Откако се обративме до државни служби на највисоко ниво, добивме писмено известување дека согласно Законот за стратешки инвестиции, предложената инвестиција се уште е во фаза на разгледување. Веднаш кога ќе има конкретен предлог договор, тој ќе биде јавно објавен. Дополнително, ќе биде испратен и во вид на предлог закон до Собранието на Република Северна Македонија, појасни Тодоров.
Тој нагласи дека ваквиот одговор ги загрижува како екологисти.
-Сметам дека за вакви прашања, надлежните државни и локални органи треба да го почитуваат и мислењето на локалните жители. Во спротивно, ќе се соочат со нивното незадоволство, додаде Тодоров.
Тој рече дека будно ја следат состојбата со сите иницијативи коишто се преземаат, и ќе реагираат секогаш кога ќе се појави опасност од загрозување на животната средина.