Во својот прв европски натпревар машкиот ракометен клуб на Бутел од Скопје триумфираше денеска во првиот натпревар од второто квалификациско коло од ЕХФ Купот против ЗТР Запорожје со 18:14 (8:7).

Во текот на првото полувреме Бутел имаше предност од 6:3 после скоро 20 минути игра во СРЦ „Кале“, а „плус три“ одржуваше и на стартот од вториот дел (10:7).

Следуваа три голови во низа на гостите за израмнување, дури и поведоа во 46 минута на минимални 12:13. Но, потоа возврати нашиот претставник со своја серија на погодоци од 5:0, за на семафорот на три минути до крајот на средбата да стои 17:13.

Најрасположен во македонската екипа беше Мирко Мајиќ со седум голови, трипати во листата на стрелците се запиша Златко Мојсоски.

На спротивната страна четири погодоци беа дело на Олександр Тилте, а три запиша Андриј Акименко. Реваншот ќе се игра на 13 октомври на теренот во Украина.