ЕХФ го менува правилото пред Европско: Пет дена карантин и два негативни теста
Европската ракометна федерација (ЕХФ) денеска се одлучи за промена на прописите околу настапот на играчите на претстојното Европско првенство во Унгарија и Словачка во кое учесник е и македонската сениорска репрезентација.
Како што е веќе познато, континенталниот собир ќе се одржи од 13 до 30 јануари, нашата селекција во рамките од групата „А“ во унгарскиот град Дебрецин, а прв противник е Словенија на 13 јануари со почеток од 18.00 часот.
Пред два дена беше објавено дека сите македонски репрезентативци беа негативни на ковид-19, а нови тестирања според протоколот на ЕХФ за учество на ЕП 2022 се очекува да направат уште на 7 и 10 јануари.
Поради сè повеќе позитивни тестови на коронавирус кај многу репрезентации-учеснички, правилото „14 дена за изолација“ ќе се менува.
Новата состојба ќе биде пет дена карантин по позитивен тест, и два последователни негативни теста (најмалку 24 часовен интервал помеѓу двата теста), по што ракометарот ќе се стекне со право на настап на Европското првенство.
Оваа одлука од страна на Извршниот комитет на ЕХФ беше неизбежна и која се заснова на најновите препораки во однос на периодите за изолација, за да се добие регуларност без значителен пад на квалитетот на репрезентациите.
Лицето, исто така, мора да биде ослободено од какви било симптоми и да приложи медицинска потврда за да ја потврди неговата способност да учествува на вакви големи спортски настани.