Во дербито на вечерта во ракометната Лига на шампионите, Фленсбург со 28:27 го совлада ПСЖ кој продолжи со променливите игри. Само два дена откако го декласираа Киелце со 37:26, ракометарите на ПСЖ загубија со минимални 28:27 и тоа благодарение на одличната игра во првото полувреме кое германскиот тим го доби со 19:11. Во вториот дел ракометарите на ПСЖ успеаја да се вратат во игра, намалија на 27:26, но Фленсбург со голот на Согард Јоханесен ги реши дилемите околу победникот. Ване со осум гола и Готфридсон со седум голови беа најефикасни во тимот на Фленсбург, додека за ПСЖ Микел Хансен даде седум гола.

Еден од главните фаворити за титулата, Веспрем немаше никакви проблеми на гостувањето кај Загреб и славеше со 28:35. Македонскиот репрезентативец Дејан Манасков постигна еден гол за Веспрем каде најпрецизни беа Нилсон и Мае со по шест погодоци.
Претходно Нант и Кил одиграа 24:24 во натпревар во кој капитенот и селектор на македонската репрезентација, Кире Лазаров беше најпрецизен во францускиот тим со пет постигнати голови.

Резултати:
Мотор – Алборг 27:29
Нант – Кил 24:24
Пик Сегед – Киелце 26:30
Фленсбург – ПСЖ 28:27
ППД Загреб – Веспрем 28:35