Е. Пелистер против Татабања ја брка втората победа во Лигата на Европа
Денеска со почеток од 18.45 часот во салата „Боро Чурлевски“ – Битола составот на Е. Пелистер на домашен терен ќе игра против унгарската Татабања во рамките од четвртото коло во Лигата на Европа.
Во минатото коло играчите на тренерот Жељко Бабиќ триумфираа во Грција над АЕК, а со нови бодови ќе направи важен чекор во обидот да се најде на една од првите четири позиции кои водат во плеј-офот.
Натпреварот ќе го водат руските судии Константин Ершов и Антон Пављуков. Овие судии минатата година во истото натпреварување го водеа дуелот на Е. Пелистер и ГОГ Гудме.
Делегат на ЕХФ ќе биде Синиша Рудиќ од Хрватска. Овој меч ќе се игра со 50% исполнетост од капацитетот на спортската сала „Боро Чурлевски“.
Моментно на табелата во групата „Д“ на делба на првата позиција се Ним, Спортинг и АЕК со по четири бодови, три има Е. Пелистер, два Татабања, а последен е Кадетен со еден.
Останатите два меча од групата Кадетен – Ним и Спортинг – АЕК ќе играат од 20.45 часот.