Американската актерка Џејми Ли Кертис ја поддржа својата колешка Памела Андерсон во нејзината кампања за промоција на природната убавина, за време на која таа се појави без шминка на Модната недела во Париз.

Неодамнешното појавување на Памела Андерсон без навестување за шминка на модната недела во Париз беше настан достоен за внимание не само за светските таблоиди.

Најпознатата „чуварка на плажата“, секс икона на деведесетите години на минатиот век и една од пионерите на „пластичната“ убавина, во последните години промовира природен изглед, не се шминка и гордо ги покажува своите 56 години, што предизвикува и позитивно и иронично коментари во јавноста.

„Убавината е во самоприфаќањето, во несовршеноста и во љубовта“, напиша Андерсон во описот на фотографиите од Модната недела во Париз.

Таа доби голема поддршка и од нејзината колешка Џејми Ли Кертис, која и самата во неколку наврати ја искритикува подготвеноста на мнозинството да потклекне на токсичните трендови за зачувување на младоликиот изглед, користејќи алатки за уредување фотографии и естетски процедури.

„Револуцијата за природна убавина официјално започна!“, напиша 64-годишната оскаровка на својот инстаграм-профил, наведувајќи дека се восхитува на чинот на храброст и бунт на Андерсон.

Во последниве години, наспроти трендовите за „анти-стареење“, Џејми Ли Кертис изјави дека се залага за „про-стареење“ – достоинствено прифаќање на промените поврзани со возраста.