Џафери сака да се измени собранискиот Деловник, да се отстранат „процедуралните пречки“
Измени на Деловникот за работата на Собранието се важни и тие ќе овозможат пратениците да фокусираат на суштинските прашања, без при тоа да бидат забавени од сите процедурални пречки кои се вистински предизвик за работата на Собранието, изјави денеска претседателот на Собранието Талат Џафери на Конференцијата на Европскиот парламент.
На конференцијата на тема „Креирање на парламентарна демократска култура преку дијалог и градење консензус“, Џафери зборуваше за дијалогот на парламентарните групи во рамки на процесот „Жан Моне“.
Џафери вели дека ова е долгорочен процес кој може да трае и неколку години и дека се состои од неколку рунди на дијалог.
„Ако сакаме да имаме култура на дијалог меѓу политичките партии застапени во Собранието, ние мора да работиме заедно. Но, да нема недоразбирање – тоа не значи дека бараме униформност. Ние сите сме членови на различни политички партии, со различни политички програми за кои сме добиле доверба од граѓаните и согласно тие програми даваме приоритет и на различни цели“, вели Џафери.