Како што објави СЕХА Газпром лига, фановите ги избраа најдобрите осум играчи во ова регионално ракометно натпреварување.

Во оваа совршена „осумка“ се наоѓаат и двајца македонски репрезентативци, голманот Никола Митревски (Еурофарм Пелистер) и Стојанче Стоилов (Вардар).

Битолскиот ракометен клуб Еурофарм Пелистер има уште претставник на оваа листа, станува збор за хрватскиот интернационалец Ловро Јотиќ.

Покрај нив, тука се и левиот бек Расмус Лауге Шмид (Веспрем), средниот бек Ловро Јотиќ (Еурофарм Пелистер), десниот бек Микита Ваилупау (Мешков Брест), левото крило Давид Мандиќ (ППД Загреб) и десното крило Златко Хорват (ППД Загреб).

Моментно поради пандемијата на коронавирус, во прекин е СЕХА Газпром лигата (како и еврокуповите), од претходно е познато дека е одложен Ф4 турнирот кој што треба да се одржи во Задар, Хрватска.

Веќе се промовираа првите полуфиналисти, Мешков Брест (Белорусија) и ППД Загреб (Хрватска), а многу блиску да го направи истото е и Веспрем на нашиот Дејан Манасков кој во Нови Сад триумфираше над Војводина со пет голови разлика.

Останува да се види дали во последната фаза за трофејот ќе се најде и бранителот на титулата, Вардар кој славеше со 30:31 на гостувањето кај хрватскиот Нексе во првиот натпревар од четвртфиналниот двомеч.