Двајца градоначалници дале исказ во ОЈО за аферата „Рекет“
Градоначалникот на Карпош вчера, а денеска градоначалничката на Битола во Основното јавно обвинителство во Скопје дале исказ за аферата „Рекет“. Од ОЈО известија дека во интерес на истрагата, нема да споделат детали од дадените изјави.
„Паралелно со прибирањето на вербални докази, Основното јавно обвинителство за гонење на организиран криминал и корупција во континуитет дава насоки и наредби за вршење и на други истражни дејствија. Вештачењата на прибраниот обемен материјал од извршените претреси е во тек. По наредба на обвинителството се врши и вештачење на содржината на пронајдениот и одземен втор мобилен телефон на јавниот обвинител. Почитувајќи ја транспарентноста во работењето, Основното јавно обвинителство за гонење на организиран криминал и корупција ќе продолжи со информирање на јавноста за преземените дејствија секојпат кога ќе постојат законски можности и во обем кој не ја попречува истрагата“ известија од ОЈО.
Аферата „Рекет“ се однесува за притворениот Бојан Јовановски познат како Боки 13 и Зоран Милевски – Кичеец. Тие се во притвор откако ОЈО ги обвини за „примање награда за противзаконито влијание“, а првоосомничениот Јовановски и за „перење пари и други приноси од казниво дело“.