Двајца македонски државјани се повредени во земјотресот во Турција. Според информациите од МНР, се работи за ученици кои преку програмата „Еразмус плус“ престојуваат во таа земја.

– Министерството за надворешни работи преку своите Амбасадата во Анкара и генералниот конзулат во Истанбул обезбедија информации и стапија во контакт со деветте наши државјани кои се наоѓаат во загрозениот регион. Се работи за осум ученици и нивен ментор/наставник, кои преку програмата „Еразмус плус“ престојуваат во Република Турција. Како последица од земјотресот, двајца од учениците се здобиле со телесни повреди: едниот ученик е со потешки повреди – скршеница на која во моментов работат медицински лица и е во фаза на санирање, додека вториот ученик е со полесни повреди. Ниту еден од учениците и менторот не е во животна опасност – информираа од Министерството.

Досега во МНР нема информација за други македонски државјани кои се наоѓаат во загрозена состојба, или на кои им е потребна асистенција, но како што велат оттаму, претставништвата остануваат во континуирана комуникација како со надлежните институции на Турција, така и со македонски граѓани кои се информираат и кои информираат за состојбите на терен.

– По инструкција на МНР, дипломат од Амбасадата во Анкара е веќе упатен во регионот за да помогне во евакуацијата на учениците од градот Кахраман Мараш, како и да обезбеди информација и присуство директно на терен во најзагрозените делови за евентуални дополнителни интервенции – додаваат од МНР.

Од Министерството потсетуваат дека дипломатските претставништва во Турција се на 24-часовно располагање за сите евентуални прашања, на телефонските броеви: +905394569710 во Анкара, +905456149777 во Истанбул, и + СОС телефонот на МНР во Скопје 38975273732.

Македонскиот спортист Лука Станковски го избегнал катастрофалниот земјотрес во Газиантеп, Турција: Добив два слободни дена и се вратив во Скопје