Лекарите дефинираа список на симптоми на коронавирусот кај децата, кој вклучува висока температура, нова, упорна кашлица и губење или промени во сетилата за вкус и мирис. Сепак, истражувањето на британските научници од Универзитетот во Белфаст покажа дека дигестивните проблеми се главниот симптом на овој вирус кај децата, односно нервозниот желудник.

– Проливот и повраќањето беа попрецизен индикатор отколку, на пример, кашлањето, па дури и промените во сетилата за вкус и мирис – објаснува Том Вотерфилд, автор на студијата.

Научникот исто така истакнал и дека со помош на досега препознаените симптоми на инфекцијата со коронавирусот, заразата може прецизно да се утврди во 76 отсто од случаите на симптоматски деца, но кога ќе се додадат и проблемите со варењето, тогаш сигурноста на дијагнозата се качува до 97 отсто.

Студијата опфатила 990 деца на здравствени работници. Научниот тим открил дека 68 деца имале антитела на коронавирусот и дека ја прележале оваа болест. Сепак, само половина од нив имале симптоми на ковид-19 и ја преболеле болеста.

Некои симптоми биле вообичаени: 31 отсто имале температура, 18 отсто главоболка, 19 отсто желудочни проблеми, дијареја, повраќање и грчеви. Кај децата што немале антитела, овие симптоми се појавиле во три отсто од случаите.

Губењето на апетитот е јасен симптом

Другиот тим истражувачи од Лондон спровел студија на 250.000 деца и резултатите се поклопиле со претходното истражување. Сепак, оваа студија утврдила дека губењето на апетитот е многу попрецизен симптом на коронавирусот отколку кашлицата, која е почеста кај возрасните.

– Губењето на апетитот, кое е често и кај обичните вируси, е особено изразено кај децата, покрај проблемите со желудникот – објаснуваат научниците во студијата.

Затоа фокусот на родителите мора да биде насочен кон следењето на проблемите со варењето и губењето на апетитот кај децата.