Организаторот на Олимписките игри кои треба да се одржат летово од ден во ден се соочува со нови проблеми. Градот домаќин Токио е под карантин поради пандемијата на коронавирусот, јавните анкети во главниот град на Јапонија покажуваат дека граѓаните не сакаат Олимписките игри да се одржат летово, а организаторот сега се соочува со нови проблеми кои му ги задаваат останатите јапонски градови.

Имено, 500 градови во Јапонија се регистрирани да го дочекаат олимпијците и да организираат тренинг кампови, меѓутоа 40 од нив одлучија да не го прават тоа поради преоптеретените медицински капацитети.

Олимписките игри во Токио требаше да се одржат минатата година, но поради пандемијата на коронавирусот се одложени за оваа година и треба да се одржат од 23. јули до 8. август.
Во Јапонија денеска се пријавени повеќе од 7.000 новозаболени од коронавирус, но најголем проблем за јапонските власти претставува малиот број на вакцинирани луѓе, бидејќи само 2.8 проценти од населението во Јапонија се вакцинирани.