Голден стејт вориорс потешко од очекувањата со 4:2 во победи го елиминира ЛА клиперс и се пласира во полуфиналето на Западната конференција. „Воините“ во шестиот натпревар победија со 129:110 и тоа благодарение на фантастичниот Кевин Дурант кој натпреварот го заврши со 50 постигнати поени.

Дурант во првото полувреме постигна 38 поени со што се израмни со Чарлс Баркли на второто место на вечната листа по бројот на поени во прво полувреме на плејоф натпревар. Рекордот изнесува 39 поени и е во сопственост на Мајкл Џордан.

Покрај Дурант, одлична вечер имаа и Стеф Кари со 24 поени и Дрејмонд Грин кој оствари трипл-дабл од 16 поени, 14 скокови и 10 асистенции.  Кај ЛА Клиперс, најпрецизен беше Данило Галинари со 29 поени.

Првиот натпревар помеѓу Голден стејт и Хјустон во полуфиналната серија ќе се игра в недела, додека полуфиналните пресметки во Источната конференција помеѓу Торонто –Филаделфија и Милвоки – Бостон започнуваат вечерва.