Државната дума го одобри приклучувањето на окупираните украински региони кон Русија
Долниот дом на рускиот парламент ги одобри законите за приклучување на четирите окупирани украински територии кон Русија, по референдумите кои Украина и Западот ги осудија како принудни и нелегитимни, јави Ројтерс.
Ниту еден пратеник во Државната дума не гласаше против резолуциите, со кои се бараше формално да се вклучат украинските региони Херсон, Доњецк, Луганск и Запорожје во Русија.
„Одлуката е донесена едногласно. Во Руската Федерација има 89 ентитети“, објави претседателот на парламентот Вјачеслав Володин на Телеграм.
Говорејќи веднаш по гласањето, министерот за надворешни работи Сергеј Лавров им честиташе на претставниците од четирите региони и рече дека е уверен и горниот дом на парламентот ќе ги одобри мерките.
Не се очекува никакво противење на резолуциите ниту во Думата, ниту во Горниот дом, Советот на Федерацијата.
Русија започна формален процес на анексија на четирите украински територии минатата недела, но ниту една не е целосно под контрола на нејзините сили.