Министерството за труд и социјална политика и Министерството за финансии сериозно да го сфатат проблемот со недостигот на кадар во градинките и да обезбедат пари за нови вработувања – повика вчера градоначалникот на Општина Карпош, Стевче Јакимовски.

– Со сегашниот капацитет на градинките многу е тешко, речиси невозможно, да се реализира воспитно-образовниот процес. Овој проблем ми беше изнесен уште на првиот работен состанок со директорите на градинките, при што ми беше укажано дека само во една од нив недостигаат 18 воспитувачки и негувателки. И тогаш и сега јавно побарав од надлежните институции да го сфатат сериозно проблемот и да одговорат позитивно на нашето барање, но, за жал, сè уште нема никаква реакција од нивна страна – вели градоначалникот Јакимовски.

Претходно „Слободен печат“ пишуваше дека поради недостиг од кадар и недоволната соработка со Министерството за труд и социјална политика, Општина Гази Баба ќе биде принудена да ја затвори групата на градинката „Пеперутка“ во Стајковци. Градинката „25 Мај“ поднела барање до Министерството за труд и социјална политика за одобрување на 21 вработување за негувателки и воспитувачки, но сè уште нема никаков одговор, а платите на вработените ги обезбедува општината.

– Станува збор за голем трошок, кој наместо да се намени за подобрување на инфраструктурата, оди за плати за вработените, што е единствен ваков случај. Ако Министерството продолжи да ги игнорира нашите барања, ние ќе ја затвориме градинката, а децата ќе останат дома – предупредува градоначалникот Бобан Стефковски.

Јакимовски вели дека потребата од пополнување на испразнети места и отворање нови работни места во градинките е општ проблем, со кој се соочуваат многу општини.

– Барањата се со цел да се подобрат условите во институции што се грижат за нашите деца, а не заради пресметка со политичките противници. Ги повикав по вторпат надлежните институции да се вклучат во решавање на прашањето за да придонесеме што е можно побрзо да се подобрат условите во градинките – рече Јакимовски.

Од Министерството за труд и социјална политика велат дека процесот на кадровско доекипирање на градинките нема политичка заднина.

– Во изминативе месеци целиот процес беше запрен поради локалните избори, а сега се соочуваме со крајот на фискалната година, па процесот се одвива со намалена динамика – велат од МТСП.