Минатата година државата на компаниите во индустриско-технолошките зони им дала помош од 21 милион евра. Но, од друга страна овие компании врз основа на даноци и придонеси во државната каса вложиле повеќе од 39 милиони евра.

– Ова се пари што се потребни за пензии, јавно здравство, образование, инфраструктура. Веќе работиме на посебни механизми за поттик на инвеститорите што побрзо да ја искористат помошта и да почнат да уплаќаат повеќе пари во државниот буџет. Поддршката на државата на инвеститорите е и поддршка на десетици илјади наши сограѓани низ целата земја – рече директорот на Дирекцијата за технолошко-индустриски развојни зони (ТИРЗ) Јован Деспотовски на презентација за работењето на компаниите во овие зони.

Во зоните има 14.000 вработени, а тие имаат обврска за уште 7.500 вработувања. Просечната бруто плата на вработените во ТИРЗ-те во 2020 изнесувала 37.658 денари, а во нето износ таа е за 1,8 проценти поголема отколку во 2019 година, со тенденција да се зголемува и да биде повисока од просекот на државата.

– Тоа ќе се постигне најмногу ако се привлекуваат поголем број на компании од сектори со поголема додадена вредност, како фармацевтскиот, на пример, и други слични инвестиции кои се во најава. Се разговара и за менување на критериумите за државната помош на компаниите во зоните, зависно од дејноста на која припаѓаат и бројот на вработените – рече Деспотовски.

Компаниите во зоните оствариле вкупна добивка од 65 милиони евра и таа е за 40 отсто помала отколку во 2019 година