Поетот и академик Радован Павловски е добитник на повелбата „Блаже Конески“, што на секои пет години ја доделува Друштвото на писатели на Македонија. Пред пет години ДПМ ја започна традицијата за доделување на Повелба со името на нашиот најистакнат книжевник и лингвист – Блаже Конески. Повелбата се доделува за врвни творечки остварувања од парадигматски карактер, што оставиле трајни белези во развојните процеси на македонската литература и што имаат значајни проблесоци во литературните и културни центри во Европа и во светот.

Прв добитник во 2015 година беше поетот и академик Матеја Матевски. Годинашниот добитник Радован Павловски е еден од најпреведуваните и најнаградувани македонски поети. Согласно условите диктирани од пандемијата, ДПМ Повелбата на Павловски свечено ќе му ја врачи во септември 2021 година во Небрегово, родното место на Конески. Во меѓувреме ДПМ го подготвува и првиот број од ревијата „Стожер“ за следната година, во која лице во фокус ќе биде Радован Павловски.

(Текстот е објавен во „Културен печат“ број 61, во печатеното издание на „Слободен печат“ на 19-20 декември 2020)