Соочени со новиот светски поредок, секојдневните промени кои ги наметнува пандемијата на коронавирусот, а оттука и неможноста човекот да се прилагоди на сите невидливи бариери и опасности, принудени бевме како сигурна варијанта да го одбереме онлајн изданието, кое од 13 до 15 ноември ќе може да се проследи преку фестивалската веб-страница, најавија организаторите на струшкиот филмски фестивал „Дрим шорт“.

– Ние не сме (анти)хероите кои ќе пркосат на реалноста, ние не сме единствениот фестивал што ќе се спротивстави на короната, а за нас мала, но многу важна победа е задржаниот континуитет на фестивалот, кој ќе му овозможи да расте и да станува неминовност, белег и потреба, каде што секоја година струшката реалност ќе се судрува со магијата на филмот – додаваат од „Дрим шорт“.

Иако виртуелно, сепак фестивалот ќе ги собере најдобрите кратки филмови од изминатата година, кои во себе носат пораки од целиот свет дека, сепак, сечија животна приказна е борба вредна за раскажување. Во време кога просторот помеѓу нас значи безбедност и начин на борба против вирусот, а физичката блискост опасност, останува уметноста да го поврзе светот на ниво повисоко од физичкото, да создаде поле од вредности што слободно ќе ги облагородува луѓето и ќе им ја исполнува оставената празнина.

Кога вирусот ќе биде совладан, важно ќе биде дали ќе извлечеме поука или едноставно ќе ја турнеме пандемијата во минатото, како уште една заборавена криза. Минатото, како и филмот, има почеток, кулминација и крај. Соочувањето со минатото како концепт, во реалноста и во филмот, е темата што е во фокус на четвртото издание на „Дрим шорт“, кое ќе се одржи со мото „Минатото мора да заврши“. Фестивалската програма ќе содржи повеќе од 50 филмови, распределени во стандардните три селекции – интернационална, национална и студентска програма, а годинава фестивалот ќе биде збогатен и со три нови програми, кои третираат специфични теми. Дел од програмата е и мастеркласот со Тамара Котевска, корежисерката на документарецот „Медена земја“. Партнер на четвртото издание на „Дрим шорт“ е Форум ЗФД, а фестивалот е поддржан од Германската амбасада во Скопје.

(Текстот е објавен во „Културен печат“ број 55, во печатеното издание на „Слободен печат“ на 7-8 ноември 2020)