„Дожд“ од голови во Фиренца: Елмас дебитираше во Серија А! (ВИДЕО) – Слободен печат
СпортФудбал

„Дожд“ од голови во Фиренца: Елмас дебитираше во Серија А! (ВИДЕО)

Дефинитивно стартот на сезоната во најсилната италијанска лига не разочара, голем број на голови уште во првите два натпревари одиграни во Парма и Фиренца.

Екипата на Наполи го започна шампионатот во Италија со победа, во дуел исполнет дури со седум погодоци славеше вицешампионот на гостувањето кај Фиорентина со 3:4 (1:2).

Прекрасен отворен фудбал од двете страни, немаше да биде незаслужено доколку на крајот и „виолетовите“ ги освоија трите бода.

Кај домаќините настапија две звучни имиња кои дефинитивно можат да помогнат за висок пласман во Серија А сезоната, станува збор за Боатенг и Рибери.

Успешен старт имаа домаќините со водство преку Пулгар од пенал, но „наполитанците“ за период од пет минути се вратија и направија пресврт благодарение на Мертенс и Инсиње.

Продолжи неизвесноста во второто полувреме, за нов егал се погрижи Миленковиќ, па Каљехон стрелаше во 56 минута, а само четири минути после неговото влегување во листата на стрелците со еден прекрасен удар се запиша Боатенг во 65 минута.

Но, само 120 секунди подоцна Каљехон убаво го пронајде Инсиње кој со својот втор погодок на дуелот го постави конечниот епилог.

Во 72 минута следуваше влегувањето на македонскиот репрезентативец Елиф Елмас како замена за Алан што значеше и официјално деби во Серија А. Нашиот играч донесе стабилност во средниот ред, со прецизни додавања до своите тимски колеги. Може да биде закана и во нападот, а покажа и некој дриблинг плус. Евидентно е дека тренерот Карло Анчелоти „експериментира“ со него поставувајќи го на различни позиции и се обидува да ја пронајде неговата вистинска улога на теренот. Секако ова е само почеток на сезоната, Анчелоти внимателно ќе го следи неговиот развој, а во следното коло Наполи повторно гостува овојпат кај шампионот Јувентус на 31 август.

Кога сме кај бранителот на титулата, исто така стартуваше триумфално кај Парма минимално со 0:1. Стрелец на единствениот погодок за „Старата дама“ беше Кјелини во 21. минута од средбата на „Енио Тардини“.

Преземањето на оваа содржина или на делови од неа без непосреден договор со редакцијата на Слободен Печат значи експлицитно прифаќање на условите за преземање, кои се објавени на сајтот.

Тагови

Напишете коментар

Вашата адреса за е-пошта нема да биде објавена. Задолжителните полиња се означени со *

Close