Тоа го нагласи и еден од важните играчи на „пандевци“, Дориев кој верува дека може неговиот клуб да дојде до втората позиција, односно бидат пред скопските „црвено-црни“.

Освен тоа, струмичката екипа ќе игра и финале во Купот каде што силите ќе ги одмерат против Македонија ЃП.

– Па добро, како и што знаете се подготвуваме истовремено и за финалниот куп меч на 22 мај. Секако дека нема да ги оставиме и тие два лигашки натпревари против Шкендија и Вардар. Имаме добри шанси да се најдеме на второто место на табелата, затоа што Вардар ни доаѓа во последното коло и мислам дека ќе се одлучува оваа средба – ни изјави фудбалерот на Академија Пандев, Љупче Дориев.

Моментно во генералниот пласман Шкендија е на врвот со недостижни 76 бодови, Вардар е втор со 60, Академија Пандев на третата позиција (57), а далеку зад нив е Шкупи (44).

Во следното претпоследно коло на 19. мај играчите на тренерот Југослав Тренчовски ќе гостуваат во Тетово кај старо-новиот шампион, а во истиот термин од 16:30 часот една недела подоцна ќе го пречекаат Вардар.