Дончиќ не е од оваа планета, ја уништи Аргентина
Лука Дончиќ на неверојатен начин го започна дебитантскиот настап на Олимписките игри, во победата на неговата Словенија од 118:100 над Аргентина.
Бекот на Далас маверикс натпреварот го заврши со 48 постигнати поени.
Одличната партија, Дончиќ ја најави уште на стартот кога за пет минути игра постигна 15 поени. Провокациите од трибините уште повеќе го налутија Дончиќ и во првото полувреме додека беше на теренот, тој постигна повеќе поени од целиот тим на Аргентина. За 15:24 минути во првиот дел, Дончиќ постигна 31 поен, а целиот тим на Аргентина само 29 поени.
Дилемите околу победникот беа решени уште во првиот дел, Словенија на одмор замина со 20 поени предност 62:42 и во второто полувреме рутински ја одржуваше убедливата предност. Единствена непозната беше со колку поени Лука Дончиќ ќе го заврши натпреварот, бекот на Далас застана на бројката од 48 постинати поени, а имаше и 11 скокови. Клемен Препелиќ даде 22 поениј, а Мајк Тоби имаше 11 поени и 14 скокови. Кај Аргентина најдобар беше ветеранот Луис Скола со 23 поени.