Клиперси го претрпеа и третиот пораз во Лос Анџелес од екипата на Далас со 102:87. Кристапс Порзингис постигна 18 поени, 13 скокови, а истиот број на поени како Летонецот го забележа и Џастин Џексон.

Словенечкиот кошаркар Лука Дончиќ запиша 15 поени, 13 скокови и три асистенции. Центарот на Маверикси, Бобан Марјановиќ мечот го заврши само со четири поени (2/4 од поле, 0/1 од слободните фрлања), седум скокови, една асистенција и две блокади за 18 минути.

Имаше и тензични моменти во текот на овој контролен меч и малку недостасуваше да избие тепачка. Имено, еден од најперспективните европски кошаркари Лука Дончиќ влезе во физички судир со дебитантот во НБА лигата, Теренс Ман, после неговиот неспортски потег.

Еден од судиите досуди чекори од Дончиќ, Ман веднаш ја тргна топката од рацете на Дончиќ, а овој неспортски потег не му се допадна на Словенецот кој потоа веднаш размени тешки зборови со Ман, го турна, а потоа возврати и играчот на Клиперси.

Веднаш реагираа останатите играчи на двете екипи, прв кој реагираше беше Бобан Марјановиќ кој веднаш на страна го тргна Лука Дончиќ.