Пред бараките на Град Скопје денеска можеа да се забележат принтери, заедно со натписи „Донација за менаџерката“ и „Плаќам данок – донирам принтер“.

Град Скопје вчера остана без принтерите кои во изминативе две и пол години ги изнајмуваше од „Интек системи“. Вработени од фирмата вчера ги зедоа печатачите од градските бараки, ги натоварија во камион и ги однесоа, откако Градот предвреме го раскинал договорот за изнајмување. Сега, според неофицијални информации, градската администрација функционира само со неколку принтери, кои се малку за службите непречено да ја вршат својата работа.

Градот бара за изнајмување 34 печатачи од неколку типови, за кои изнајмувањето ќе чини околу 90.000 евра и ќе се плати од средства кои се обезбедени во Буџетот на Град Скопје.