Објектот Дом на АРМ ќе биде управна зграда за Националната установа „Музеј на тетовскиот крај” и мултимедијален капацитет со одлука на Владата. Оваа информација ја објави Даријан Сотировски, директор на Комисијата за односи помеѓу верските заедници и религизони групи, инаку од Тетово, кој го иницирал прашањето пред Владата и Министерството за култура. Веќе неколку години објектот, Дом на Армијата во Тетово не функционира.

– Едно важно прашање за нашиот град Тетово, кое го иницирав пред неколку месеци и на кое работевме, денес е конечно реализирано и се радувам поради тоа. После повеќе децении со одлука на Владата добива своја управна зграда и мултимедијален капацитет, со кој ќе може да понуди многу на градот Тетово. Култниот „Дом на АРМ” во Тетово ќе биде новото седиште на музејот и ќе продолжи да биде средиште на сите случувања во срцето на градот. Изразувам благодарност до Владата и министерот за култура д-р Стефоска за поддршката која ја дадоја изминатиот период, изјави Сотировски.

Досега вработените на Музејот имаа канцеларии во Спомен куќата на народниот херој Ѓоце Стојчевски-Амбарче.

– Една од главните цели на Музејот е да ги чува спомените и афирмира вредностите на Народноослободителната борба (НОБ) на македонскиот народ и народностите, да ги осветлува делата на историските великани, да ги чува спомен куќите на семејството Јовановци каде е формирана КПМ и куќата на народниот херој Ѓоце Стојчевски Амбарче, па овозможувањето на услови за работа на истиот е значаен придонес кон негувањето на духот на антифашизмот во градот херој.

Сотировски вели дека со директорот на Музејот, Миќо Стојчевски и истакнати културни работници се разработува визијата како новото седиште по реновирањето да прерасне во витална културна артерија и сретнувалиште на културните работници, ентузијасти, тетовската јавност и младите.