Првите две епизоди од документарниот филм „Последниот танц“ кој е посветен на најдобриот кошаркар во историјата, Мајкл Џордан, и неговите Чикаго булс ги соборија сите рекорди по гледаност на документарни филмови на телевизијата ЕСПН.

Телевизијата денеска објави дека просечната гледаност на првите две од вкупно десет епизоди изнесувала 6.1 милиони гледачи. Првата епизода ја гледале просечно 6.3 милиони луѓе во САД, додека втората епизода околу 300.000 помалку.

Досегашниот рекорд го држеше документарниот филм за Бо Џексон, кој играше во два професионални спорта во САД, американскиот фудбал и бејзбол, од 2012 година. Тој документарен филм беше погледнат од 3.6 милиони луѓе.

Според ЕСПН, документарниот филм за Џордан и неговите „бикови“ најголема гледаност имал токму во Чикаго, од 12.1 проценти.

Третата и четвртата епизода на документарниот серијал ќе се емитуваат наредната недела.