Доколку штрајкуваат поштите, ќе нема пензија за бугарските граѓани
Повеќе од три четвртини од 8.000 луѓе кои работат во „Бугарска пошта“ се изјаснија за почеток на ефективен штрајк. Тие бараат зголемување на платите за 25 отсто и зголемување на ваучерите за 40 лева што се исплаќаат секој месец. Доколку нема резултат од преговорите со властите кои се во тек, поштите ќе престанат со работа. Тоа значи дека и пензиите може да не се исплаќаат навреме.
Вака предупреди претседателот на поштенскиот Синдикат, Пламен Димитров во интервју за Нова ТВ, пренесува „24Часа“. Трошоците стануваат се повисоки од приходите во секое семејство. Приходите на луѓето не растат со таа стапка како што растат цените во продавниците. Цените на храната продолжуваат да растат дури и кога инфлацијата е умерена.
На годишно ниво, цената на храната е зголемена за 26-28 проценти. Маслото и јајцата соборуваат секакви рекорди, рече тој. Експертите истакнуваат дека инфлацијата во Бугарија е висока поради шпекулациите.
„Нема друго објаснување зошто цените на основните стоки и услуги кај нас се многу повисоки отколку во некои од нашите соседни земји“.