Дирекцијата за заштита и спасување (ДЗС) има три воздухоплова, три пилоти и шест механичари. Идната година двајца од пилотите ќе заминат во пензија, а нивното испразнето место тешко дека ќе се пополни. И сега, велат во ДЗС, бројот на пилоти не е доволен, а што ќе се прави кога и тие што ги имаат, ќе си заминат во пензија, засега немаат одговор.

– Бројот на пилоти не е задоволувачки, а бројот на механичари е задоволувачки. Следната година во февруари, два пилота одат во пензија. Многу е тешко да се најде пилот за вработување, нема интерес кај младите пилоти поради ниските плати во однос на другите воздухопловни кадри – изјавија за „Слободен печат“ од ДЗС.

Дозволата на пилотите ја издава Агенцијата за цивилно воздухопловство (АЦВ) по исполнување на основните услови на кандидатите и по успешно завршена обука.

– Бројот на лица што се во процес на обука во школите, односно организациите за обука е различен по тип на летало за кое се обучуваат. Прогресот на обука зависи индивидуално од секој кандидат. Досега во 2023 година, 5 лица се стекнале со дозвола за пилот, и тоа: еден за пилот за балони, тројца за дозвола за приватен пилот, еден за дозвола за комерцијален пилот. Во 2022 година вкупно 8 лица се стекнале со дозвола за пилот, и тоа еден за пилоти за едрилица, еден за дозвола за приватен пилот, 6 за дозвола за комерцијален пилот (1 на авион и 5 на хеликоптер) – изјавија за „Слободен печат“ од АЦВ.

Оттаму велат дека во моментов во одобрените македонски школи во постапка на обука се повеќе студенти.

– Тоа претставува добар знак по неколкугодишна стагнација и интерес на кандидатите, која е делумно предизвикана од ковид-19. Покрај организациите на територија на државата, кандидати одлучуваат обуката за пилот на авион да ја спроведуваат во странски држави, а пред се во земји членки на ЕУ од лични причини и од причина што со дозвола издадена во земји членки на ЕУ полесно можат да аплицираат за професионална работа како пилот – објаснуваат од АЦВ.

Сепак и покрај тоа што пилотирањето станува поинтересно како професија, идните пилоти не покажуваат интерес за да завршат во некоја државна институција. Тоа, го потврдуваат и во од Аероклубот „Скопје“ каде што се вршат обуките.

– Во моментов имаме четири ученици за пилоти. Веќе има закажано и нови, за следните термини. Всушност, интерес има и постојано е пополнет капацитетот. Има две категории луѓе, едни се млади што сакаат да бидат пилоти за потоа кариерно да се развиваат и нивна цел е да бидат пилоти на комерцијални авиони, а другата група се луѓе што веќе се реализирале во својата кариера и сега сакаат да учат за пилот за да може сами да летаат – вели Јане Стефанов од Аероклубот „Скопје“.

Од АЦВ ја објаснија и постапката како може да се биде пилот. За лесни авиони, едрилици и балони може да се полага уште на 16 години, за приватен пилот на 17 години, за комерцијален на 18 и за сообраќаен пилот на 21 година.

– Пилотите прво посетуваат обука во одобрени школи/организации за обука за соодветно летало (авион, хеликоптер, параглајдер, змај). По завршена теоретски курс или обука, полагаат испит во одобрените школи/организации и продолжуваат со практична обука за дадениот тип летало. По комплетирање на практичната обука, школата/организацијата спроведува испит за практичниот дел. По успешно завршена обука, школата/организацијата издава препорака за излегување на испит пред воздухопловните власти. За стекнување дозвола за пилот, кандидатот треба ги исполнува основните услови (минимум години – различно за секој тип дозвола со која се стекнува), валидно лекарско уверение (соодветна класа по тип дозвола за пилот), соодветно познавање воздухопловен англиски јазик со уверение од одобрена организација/центар. Покрај основните услови, треба да ги има положено успешно сите теоретски предмети, кои содејствуваат за типот на дозвола со која се стекнува и тоа пред надлежното тело – Агенцијата за цивилно воздухопловство. По теориските испити и препорака од школата/организацијата каде што се обучувал, кандидатот полага практичен испит (на соодветното летало на кое се вршела обуката. Практичниот испит го спроведуваат назначени и одобрени испитувачи во АЦВ – објаснија од АЦВ.