Додик: Република Српска нема план за отцепување

Милорад Додик
Милорад Додик / Фото: EPA-EFE/STEPHANIE LECOCQ

Српскиот член на Претседателството на Босна и Херцеговина, Милорад Додик денеска во Сараево се сретна со високиот политички советник на американскиот државниот секретар Ентони Блинкен, Дерек Чолет, објави РТРС.

На прес-конференција, Додик изјави дека на средбата се разговарало за ситуацијата во Босна и Херцеговина и дека Република Српска останува посветена на Дејтонскиот мировен договор.

Тој додаде дека, во разговор со Чолет, бил дециден дека Република Српска е посветена на политиката на мир и дека не е подготвена да спроведува активности кои ќе го загрозат мирот, но дека другите двајца членови на Претседателството на Босна и Херцеговина, како што рече, упорно инсистирале на можности за конфликт и војна.

– Република Српска инсистира другите во Босна и Херцеговина да го почитуваат Дејтонскиот мировен договор, а тоа го очекуваме и од меѓународните заедници и од меѓународниот фактор којшто е вплеткан во внатрешните работи на Босна и Херцеговина, рече Додик.

Тој посочи дека Република Српска го почитува надворешниот суверенитет, но и внатрешниот територијален интегритет и уставен поредок на Босна и Херцеговина која е составена од два ентитета и три конститутивни народи.

– Ја почитуваме правната рамка на Босна и Херцеговина, која е предвидена со Дејтонскиот договор, ќе ја продолжиме правната борба за почитување на Уставот, рече Додик.

Додик на прес-конференцијата сподели дека му рекол на Чолет дека Република Српска нема никаков план за отцепување, како што некои се обидуваат да ѝ припишат.

Видео на денот