Додик повторно се закани со РС-егзит и побара исполнување на барањата

Фото: Профимедиа

Додик денеска повтори дека следен чекор, доколку не се исполнат барањата на РС, би можел да биде отцепување на тој ентитет од БиХ.

Членот на Претседателството на БиХ, Милорад Додик потврди денеска дека блокадата за одлучување во телата на државната власт ќе продолжи се додека не се измени составот на Уставниот суд на БиХ, повторно заканувајќи се со излез на Република Српска доколку тоа барање не се исполни.

Додик во Источно Сараево свика состанок на сите српски претставници во телата на власт во БиХ, за да им наложи како да работат откако Народното собрание на РС минатата недела донесе заклучок дека треба да го блокира одлучувањето на државно ниво.

Тој пред новинарите истакна дека одлуката се однесува на Претседателството на БиХ, државниот Парламент и Советот на министри.

– Ниту една одлука тука нема да биде усвоена, а што се однесува до другите нивоа на власт останува се редовно, нагласи Додик.

Тој ќе продолжи да учествува на седниците на Претседателството на БиХ, но нема да гласа ниту за една одлука.

Додик најави дека во текот на денешниот ден треба да биде готов предлог новиот закон за Уставниот суд на БиХ, кој во Парламентот заедно ќе го поднесат хрватските и српските партии. Ставот на српските претставници на ниво на БиХ е дека Уставниот суд треба да има шест судии, од кои двајца од Република Српска и четворица од Федерацијата БиХ.

Босанскиот член на Претседателството на БиХ, Шефик Џеферовиќ вчера истакна дека таквиот предлог е „апсолутно неприфатлив“, потврдувајќи дека нема да има поддршка во парламентарната процедура.

Додик денеска повтори дека следен чекор, доколку не се исполнат барањата на РС, би можел да биде отцепување на тој ентитет од БиХ.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот