„Добро забавувајте се“: Бабичка сподели совет за долговечен живот на нејзиниот 108 роденден
Тајната за долг и среќен живот е „пиење алкохолна пијачка за време на ручекот и добра забава“, сподели една симпатична бабичка од Велика Британија, која неодамна го прослави нејзиниот 108 роденден, објави „Би-би-си“.
Мери Ен Клифтон го споделила овој совет за време на нејзината роденденска забава во домот за стари лица „Foxbridge House“, во Орпингтон, југоисточен Лондон. На прославата присуствувала и градоначалничката на Бромли, Хана Греј, а славеничката добила роденденска честитка и од кралот Чарлс Трети.
„Алкохолот никогаш не ми наштети. Напорно работете, но уште повеќе забавувајте се“, рекла 108-годишната госпоѓа.
View this post on Instagram
Госпоѓата Клифтон е родена на 16 март 1915 година, во Лабет, јужен Лондон. По завршувањето на училиштето, таа ги следела своите соништа, па почнала да се занимава со мода и работела како шнајдерка.
Таа го запознала својот, сега веќе починат, сопруг Ерни за време на училишните денови, кога имала само 12 години. Двојката добила две деца – Памела и Берни, од кои добиле четири внуци, десет правнуци и седум праправнуци.
Управителката на домот за стари лица, Стела Барнс вели дека госпоѓа Клифтон е „е многу сакана и популарна“ во домот, чии вработени со задоволство ѝ ја организирале роденденската забава. Тие ѝ направиле колачиња со џем и крем, а на прославата се слушала музика од дваесеттитете, триесеттите и четириесеттите години од минатиот век.