Доби поддршка од две клучни партии: Марио Драги би можел да стане италијански премиер веќе од наредната недела
Кандидатот за италијански премиер, Марио Драги, денеска доби поддршка од две клучни партии за уште следната недела да може да ја формира новата влада која ќе треба да реши како да се потрошат 200 милијарди евра помош од Европската Унија (ЕУ) за почеток на обновување на ослабената економија.
Американските медиуми јавуваат дека движењето „Пет ѕвезди” и десничарската „Лига” денеска најавија поддршка за владата на Драги, соопштувајќи дека се подготвени да го остават настрана ривалството за доброто на целата нација.
Драги (73), поранешен претседател на Европската централна банка, неделава го заврши првиот круг на разговори со политичките партии, а вториот круг се очекува на почетокот на следната недела, кога ќе разговара со кандидатите за министри и неговата визија за новата влада.
Се очекува мандатарот да се состане со голем број на синдикати, на претприемачи и други претставници на државната служба.