До лани аматер, заработуваше пари од косење трева, а синоќа го урна Реал
Преку ноќ, Себастијан Тил стана херој на Шериф Тираспол и неговото име го спомнуваат сите од вторникот вечерта во контекст дека со еврогол го урна Реал во Мадрид.
Молдавскиот Шериф во чии редови настапува и македонскиот репрезентативец Бобан Николов ја забележа и втората победа сезонава во Лигата на шампионите, овојпат со изненадувачки резултат на „Сантјаго Бернабеу“.
Во 90 минута Луксембуржанецот Тил постигна прекрасен гол за 2:1 и историски триумф на Шериф.
Ден по натпреварот, 27-годишниот играч од средниот ред откри неколку интересни детали од неговиот живот во интервју за „So Foot“:
– Имав силни грчеви, не можев да станам! Но, морам да кажам дека играчите на Реал беа фини, се однесуваа нормално, не беа арогантни. За време на играта, разговарав многу со Модриќ, разговаравме за играта и судиските одлуки – рече Тил.
Пред само една година, Тил сè уште беше аматер и играше за клуб од средината на табелата на шампионатот во Луксембург. Официјално сè уште е играч на истиот клуб, позајмен е во Шериф.
– На почетокот на минатата сезона, јас сè уште бев во Луксембург и играв за Прогрес Нидеркорн. Го играв првото коло, па се преселив во Тамбов во Русија, потоа во Тираспол. Покрај фудбалот, имав и друга работа, бев вработен во општината Диферданж и ја косев тревата на стадионот на кој играв. Покрај косењето, собирав гранчиња и лисја што паѓаат на теренот. Тоа искуство ме доведе во посебна врска со фудбалските игралишта, секогаш внимателно ги проучувам пред натпреварите – откри Тил.