Дневен ковид рекорд во Грција: Нови 460 инфицирани лица и пет починати пациенти
Во изминатите 24 часа во Грција се регистрирани вкупно 460 нови случаи на ковид-19 во Грција, што е рекорден број на дневно ниво од почеток на пандемијата. Најголем дел од нив, поточно, 114 се вработени во фабрика за конзервирање на северот на земјата, 26 по направени тестови на влезните точки во земјата, a 207 се детектирани во областа Атика. Паралелно регистрирани се и пет смртни случаи.
Епидемиолог Гикас Мајоркинис на денешната редовна прес-конференција за ситуацијата со новиот коронавирус во Грција, рече дека е логично да се очекува зголемување на ширењето на вирусот кон крајот на октомври, со оглед на тоа дека луѓето ќе почнат повеќе време да минуваат во затворени простории.
Заменик министерот за цивилна заштита на Грција објасни дека според неделниот извештај за ковид-19, во периодот од 24 до 30 септември, просечниот број на дневни случаи бил 314, просечната воараст на новозаразените е 39 години, додека пак просечниот дневен број на направени тестови е 10.617 тестови од кои голем дел на влезните точки на земјата.
Од почетокот на епидемијата, во Грција се регистрирани 19.346 случаи на ковид-19, а досега починаа 398 лица.