Битолскиот книжевен круг ја објави книгата „Сезона на пелинот“ од поетесата Љубинка Донева. Рецензентки на книгата се Даниела Андоновска – Трајковска и Лилјана Пандева.

Според Пандева, поезијата на Донева е длабока, но лесно разбирлива. „Колку е големо фармацевтското поле на истражување на пелинот уште поголема е неговата метафора што Донева маестрално ја користи, а ја затскрива зад зборовите, зад стиховите, зад песните. Когнитивното се спојува со чувственото во оваа поезија благодарение на умешното, волшебното користење на секој збор, македонски збор, некој веќе и помалку заборавен, но не и исчезнат, што само го чека вистинското време за повторно да се појави“, напиша Пандева.

Рецензентката Даниела Андоновска-Трајковска забележува дека книгата на Донева содржи „исклучително силна, емоционално напната и рефлексивно опоменувачка и освестувачка поезија, која има за цел да го протресе за рамениците целото човештво, кое брзајќи да се стигне себеси и да се изедначи со Бог, предизвикува тектонско пореметување на концептот на животот, воопшто, бидејќи се слави и се велича тоа што е гнило и пакосно, тоа што нѐ разболува и нѐ прави слаби на пороци, тоа што требало да го искорнеме од себе како плевел за да може да ни расте душата ослободена и во љубов“.

Љубинка Донева (1952, с. Соколарци) е долгогодишен професор по македонски јазик и литература. Таа е поетеса, писател за деца, книжевен критичар, лексикограф, а објавува и во македонската периодика.

(Текстот е објавен во „Културен печат“ број 100, во печатеното издание на весникот „Слободен печат“ на 9-11 октомври 2021)