Дивите ѓубришта на „удар“ на градоначалниците на Кисела Вода и Бутел
Дел од новите градоначалници мандатот го започнаа со чистење на дивите депонии на територијата на своите општини.
Во Општина Кисела Вода денеска започна да се чисти дивата депонија во месноста викана Дупка во населбата Драчево, каде според градоначалникот Орце Ѓорѓиевски, во иднина ќе има парк од 4.000 метри квадратни. Тој најави дека активностите ќе продолжат сѐ додека не се отстранат сите диви депонии во општината.
И првиот човек на Бутел се зафати со депониите.
-Денеска почнавме со отстранување на депонии во Општина Бутел, лоциравме депонии на дванаесет локации, истите ќе бидат решени за помалку од една недела – информира градоначалникот Дарко Костовски.
Градоначалникот на Општина Аеродром, Тимчо Муцински пак, минатата недела заедно со инспекторите за животна средина спроведоа мапирање на дивите депонии во општината.
Прва локација што била мониторирана, како што известија од Општина Аеродром, била локацијата кај ФФМ, каде што во програмата на Муцунски е предвидена изведба на парк од 100.000 метри квадратни со забавни содржини, но во моментов е дива депонија, на која допрва и претстои чистење.