Популарниот политичар и поранешен генерал Стојанче Ангелов од вчера е на нова функција – директор на Центарот за управување со кризи кој ќе има своја важна улога откако синоќа владата прогласи кризна состојба на целата територија на државата.

„Почитувани ФБ пријатели! Заврши времето кога безмалку безгрижно си кршев ќерамиди со глава. Од синоќа раководам со Главниот Штаб за управување со кризната состојба предизвикана од Ковид 19“, се обрати до граѓаните Стојанче Ангелов, кого неодамна владата го постави за директор на Центарот за управување со кризи (ЦУК).

Ангелов во оваа прилика ги повика и сите граѓани кои имаат конструктивни идеи, забелешки, совети и критики – да ги напишат на ФБ страната на ЦУК.

Главниот штаб за управување со кризи со кој раководи Ангелов синоќа одржа седница, а денеска на нова седница која е најавена за 16 часот треба да се разгледа Нацрт-акцискиот план за борба против пандемијата што го изготвува Центарот за управување со кризи (ЦУК).