Од Клиниката за респираторни заболувања кај децата „Козле“, реагираат на изјавата на портпаролката на СДСМ Богданка Кузеска и тврдат дека клиниката има комплетен тим за изведување на бронхоскопија со соодветна стручност на највисоко ниво за проблематиката која се работи таму.

Во тимот е бронхоскопист-орл специјалист кој е со докажани успеси со децении наназад. Материјали за бронхоскопија има и се набавуваат согласно потребите на клиниката. Нема застој во ниеден оддел или сектор во клиниката и се функционира како и претходно во нормални услови за работа. Универзитетската клиника уште еднаш укажува дека заради специфичната дејност која ја обавува и е во интерес на пациентите, не ни е потребен партиско-медиумски негативен публицитет. Исто така ја уверуваме јавноста дека секогаш и во секој поглед, стручниот тим на лекари е подготвен да реагира на највиско ниво и стандарди, потребни за една Универзитетска клиника, вели директорката доктор Каролина Симоновска.

Како што претходно објави „Слободен печат“ раководителката на одделот за бронхоскопија си дала оставка а после неа 6 членови на бронхоскопскиот тим барале да бидат изземени од него, затоа што без долгогодишните специјалисти во тимот, не знаат да изведуваат комплексни процедури.

Се распаѓа тимот во „Козле“ што ги спасуваше децата кои се борат за воздух од залетнат предмет во дишните патишта