Заменик претседателот на Владата задолжен за европски прашања, Никола Димитров денеска ќе престојува во работна посета на Брисел, што всушност е прва во седиштето на Европската Унија на претставник на новата македонска Влада.

Како што соопшти Секретаријатот за европски прашања (СЕП), предвидени се средби со потпретседателот на Европската комисија задолжен за промоција на европскиот начин на живот, Маргаритис Схинас и еврокомесарот за соседство и проширување, Оливер Вархеји, како и со други претставници на Генералниот директорат за соседство и преговори за проширување на Европската комисија.

На маргините на Советот за општи работи на ЕУ (ГАК) што неделава се одржува во Брисел, вицепремиерот Димитров ќе оствари средба и со државниот министер за Европа на Германија, Михаел Рот.

– Работната посета на заменик претседателот на Владата, Никола Димитров се случува во исклучително важен момент за Северна Македонија, во светло на дефинирање на Преговарачката рамка и одржувањето на првата меѓувладина конференција со ЕУ, што ќе означи и официјален почеток на пристапните преговори со Унијата, се наведува во соопштението на СЕП.

На средбите, Димитров ќе ги отвори прашањата поврзани со ИПА 3 програмата, имајќи го предвид утврдувањето на Повеќегодишната финансиска рамка на ЕУ 2021-2027 што е актуелно периодот. Во тој контекст ќе се зборува и за подготовките за димензионирање и објавување на најавената Економска програма за развој и инвестиции за Западен Балкан.