Динар го плати цехот на катастрофата на ЕП: Повеќе не е селектор на Франција
Неочекуваната елиминација уште во групната фаза на Европското првенство го чинеше отказ селекторот на Франција, Дидие Динар.
Откако една од најголемите ракометни сили не успеа да триумфира на последните две големи натреварувања (ЕП 2018 и СП 2019) како и дебаклот на штотуку завршеното Европско првенство, челниците на Федерацијата одлучија да му врачат отказ на Дидие Динар.
Динар на клупата на „триколорите“ го наследи трофејниот селектор, Клод Онеста, но не успеа да повторни ниту 10% од успесите на претходниот селектор, но што е побитно за челниците на Федерацијата, ракометарите не успеаја да се адаптираат на новиот систем на игра кој го форсираше Динар. Франција под водство на Динар го освои бронзениот медал на ЕП 2018 и СП 2019 година.
Репрезентацијата на Франција на предолимпискиот турнир кој треба да се игра од 17-19 април, ќе ја предводи досегашниот помошник на Динар, Гијом Жил.