Димитров очекува позитивен извештај од ЕК и одлука за преговори до крај на годината – Слободен печат
ВестиВи ПрепорачувамеМакедонија

Димитров очекува позитивен извештај од ЕК и одлука за преговори до крај на годината

Утре очекуваме позитивен извештај од Европската Комисија што реално ќе го отслика пресвртот што Северна Македонија успеа да го постигне во изминатиот период, вели Димитров.

Шефот на македонската дипломатија Никола Димитров денеска на министерскиот состанок на земјите од Вишеградската група и земјите од Западен Балкан во Братислава истакнал дека утре очекуваме позитивен извештај од Европската комисија и политичка одлука за отворање на преговорите до крајот на годинава.

– Утре очекуваме позитивен извештај од Европската Комисија што реално ќе го отслика пресвртот што Северна Македонија успеа да го постигне во изминатиот период. Како дома, преку унапредување на состојбите во клучните области и демократските процеси, така и надвор преку договорите со Грција и Бугарија. Потоа очекуваме политичка одлука за отворање на преговорите до крајот на годинава. Тоа не значи дека очекуваме и сме спремни да станеме членка денес или утре. Туку значи само отворање на следната фаза; почеток на новата етапа од нашиот европски пат кој се разбира дека ќе биде долг и ќе бара уште многу работа. Но е почеток кој е заслужен и неопходен за нашата европска иднина!, рекол Димитров во излагањето на состанокот, соопшти Министерството за надворешни работи.

На министерскиот состанок на земјите од Вишеградската група и земјите од Западен Балкан е реафирмирана посветеноста на Вишеградската група за натамошна поддршка на евроатлантската интеграција на земјите од регионот и во пресрет на објавувањето на годинешните Извештаи на Европската комисија, заеднички е констатирана потребата Европската унија соодветно да го препознае напредокот што регионот и особено Република Северна Македонија, го постигна во изминатиот период. 

На состанокот важен акцент  е ставен и врз значењето на евроинтеграцискиот процес како клучен поттик за забрзани реформи и напредок на земјите од Западниот Балкан, но и натамошна консолидација на Балканот во постојниот сложен геополитички контекст.

Годинешниот состанок во Братислава се одржа во рамките на Словачкото претседателство со Вишеградската група, каде централна тема на дискусија беше унапредување на реформскиот и евроинтеграцискиот процес на земјите од Западен Балкан и научените лекции. Дополнително, се разговарало и за заедничката европска иднина во новиот геополитички контекст.

 – Министерот Димитров во излагањето се заблагодари на поддршката од нашите партнери од Вишеградската четворка и главно се задржа на важноста од одржување на отворена европска перспектива за Регионот преку објективно препознавање на постигнатиот напредок. Притоа укажа дека овој процес е двостран, односно дека земјите аспиранти мора континуирано да работаат, да се подобруваат и да испорачуваат позитивни резултати, а ЕУ треба постигнатиот напредок адекватно да го вреднува преку процесот на пристапување, се вели во соопштението.

Димитров, посочил и дека процесот на внатрешна интеграција на Унијата треба да оди паралелно со процесот на натамошно проширување со земјите од регионот. – Европски Балкан е пред се’ интерес на нас земјите од Регионот, но и неспорен интерес на ЕУ. Ние во регионот мораме засилено да работиме кон една позитивна динамика, каде успехот ќе инспирира повеќе успех и добри вести. Истовремено важно е ЕУ да го препознава постигнатиот успех и да го оддржува процесот жив и кредибилен. На овој начин можеме заеднички да успееме и да направиме разлика, навел Димитров.

На маргините на состанокот В4 – Западен Балкан, министерот Димитров остварил разговори со домаќинот Мирослав Лајчак, министерот за надворешни работи на Словачка и другите присутни колеги, како и одвоени билатерални средби со шефовите на дипломатиите на Унгарија, Петер Сијарто и  на Албанија, Гент Цекај.

Преземањето на оваа содржина или на делови од неа без непосреден договор со редакцијата на Слободен Печат значи експлицитно прифаќање на условите за преземање, кои се објавени на сајтот.

Тагови

Напишете коментар

Вашата адреса за е-пошта нема да биде објавена. Задолжителните полиња се означени со *

Close