Димитријевиќ: Верувам дека можам да бидам лидер на репрезентацијата!
Шпанската екипа на Хувентуд Бадалона се подготвува за настапот во Еврокупот, а својот прв натпревар во новата сезона ќе го има денеска од 20.45 часот на домашен терен против белградски Партизан во рамките од групата „А“.
Во редовите на Хувентуд игра и македонскиот репрезентативец Ненад Димитријевиќ кој во интервјуто за „Спорт Клуб“ за очекувањата во новата сезона, за својот клуб, како и на репрезентативно ниво.
– Се радувам на натпреварот со Партизан, како и на почетокот на Европкупот. Во првенството веќе одигравме три меча, учествувавме и на завршниот турнир во АЦБ лигата во јуни во Валенсија и колку-толку се навикнавме да играме без публика. Пред навивачи играме цел живот, чудно е пред празни трибини, особено кога играш на домашен терен – рече Димитријевиќ.
И Лестер Бо МекКејлеб своевремено настапуваше за Партизан, а подоцна го облече и дресот на нашата најдобра селекција со која успеа да го освои четвртото место на ЕП 2011 год.
– Бо МекКејлеб, го сакав, подоцна во Шпанија и играв против него, но отсекогаш на место број еден беше Милош Теодосиќ. Тој ми е пример и еден од најдобрите играчи. Го гледам и уживам. Многу научив од него само гледајќи го. Неверојатен играч – додаде нашиот плејмејкер.
Избраниците на селекторот Александар Тодоров не започнаа најдобро во квалификациите за Европското првенство 2022 година со два стартни порази дома од Естонија и на гости од Русија. Но, Димитријевиќ се надева дека репрезентацијата ќе се врати на вистинскиот пат.
– Мислам дека треба да одиме чекор по чекор. Во тек се квалификациите за Европското првенство и доколку успееме да се пласираме би било тоа голем успех и за мене и за државата. За кариерата на секој играч е важно да направи нешто во репрезентацијата. Да остави трага. Среќен сум и верувам дека можам да бидам лидер на репрезентација – вели Димитријевиќ.