Суштинските проекти од програмите на сите кандидати за градоначалници во Општина Куманово ќе се инкорпорираат во една заедничка програма и во следните четири години ќе се спроведат, најави кумановскиот градоначалник, Максим Димитриевски, на денешната средба со кандидатите за градоначалници: Оливер Илиевски од СДСМ, Тони Михајловски од ВМРО-ДПМНЕ, Теодора Димитровска од ЛДП и ДОМ и Беким Салиу од АА/А.

На средбата се разговараше за реализацијата на проектите со кои противкандидатите настапија на Локалните избори 2021, подобрување на општината, како и за подобар квалитет на живот на сите кумановци.

– Куманово се одважи и покажа заедништво, ова е патот по кој мора да се движиме. Тоа им го должиме на граѓаните, на себе и на нашите деца. Ветувам работење исклучиво во интерес на сите граѓани, затоа што граѓанскиот интерес е пред сè! Општината и во следните четири години е отворена за сите граѓани, организации, институции, за сечија идеја и делување за подобрување и унапредување на Куманово, напиша Димитриевски.

Тој додаде дека Општината секогаш ќе биде отворена и за неговите противкандидати, затоа што, како што пишува „за интересите на граѓаните мораме да бидеме обединети и сложни”.