ВИДЕО I Димитриеска-Кочоска до Петров: Манипулирате со една милијарда евра, ковид мерките се 344 милиони евра
Сетот мерки не е една милијарда евра, туку е 344 милиони евра или 8.3 проценти од буџетот, истакна Гордана Димитриеска – Кочоска, член на ИК на ВМРО-ДПМНЕ, во вечерашната дебата во емисијата „24 Анализа” на ТВ 24 со директорот на Фондот за иновации, Коста Петров.
– Дали Вие разбирате математика господине Петров? – Имате преклопување на мерките. Значи манипулирате со една милијарда. Кога сме кај ковид мерките од Развојна банка, 31 милион евра требаше да бидат реализирани во месец септември, а тие беа објавени во месец декември. Значи со се доцните. Јули, август и септември немаше никакви мерки. За квартал четири, вкупните планирани приходи беа планирани за 6,3 проценти поголеми во однос на 2019 година, а завршивме со 5,2 проценти помалку во однос на 2019 година. Дали е тоа некаков сигнал дека нешто се случува во економијата. Не може едно да сме планирале, а друго да сме оствариле и да кажеме добри сме. И повторно ќе кажам имаме преклопување на мерки. Еве Вие кажете дали 3-тиот и 4-тиот пакет ќе бидат плус или еден, односно една мерка е тоа, рече Димитриеска – Кочоска.
Околу зголемувањето на невработени лица, Димитриеска-Кочоска посочи дека 52 лица ги загубиле своите работни места во време на корона-кризата. Во однос на просечната плата, таа истакна дека многу е битно да се знае како се пресметува просечната плата за да се знае точно дали таа е порасната или не.
– Да замислиме дека постојат тројца вработени од кои двајца земаат по 20.000 денари и едниот зема 10.000 денари. Значи вкупно имаме 50.000 денари. Делено на три доаѓа некаде 16.600 денари. Овој со ниската плата ја изгубил работата и остануваат оние со по 20.000 денари плата. Сега 40.000 денари поделено на два се 20.000 денари. Им порасна ли платата на овие со 20.000 денари? – Секако дека не им порасна. Значи ова е факт. А во овој период ниско квалификуваните ја губат работата. Тие 20.000 денари останаа исти, само поради различната пресметка велиме е пораснато. Така да ова се реалните економски бројки, вели Димитриеска – Кочоска.