Дијаспората на БиХ во САД не го сака Германецот Кристијан Шмид за нов Висок претставник во нивната земја
Босанско-американските здруженија испратија писмо до американскиот државен секретар Ентони Блинкен во кое изразуваат незадоволство од одлуката на германските власти за нов Висок претставник во земјата да го испратат Кристијан Шмид.
Во писмото до Блинкен, што го потпишаа Советодавниот совет за БиХ во Вашингтон, босанско-американското здружение од Ајова, босанското-американскиот Институт за геноцид и Здружението на Бошњаци во Џорџија, меѓу другото, се наведува дека Канцеларијата на високиот претставник останува клучен институционален столб во демократијата на БиХ.
– Денеска ви пишуваме за да ја изразиме нашата сериозна загриженост во врска со германската номинација на Кристијан Шмид за функцијата Висок претставник во БиХ. Како претставници на босанско-американската дијаспора ширум САД, не веруваме дека Шмид покажа визија, капацитет и подготвеност да промовира кредибилна политика што ќе биде ориентирана на реформи, се вели, меѓу другото, во писмото до Блинкен.